Монгол Улсын Ерөнхий сайд С.Баяр Хятадын үндэсний газрын тос, байгалийн хийн корпорацийн дэд ерөнхийлөгч Ван Дунжиныг өчигдөр хүлээн авч уулзлаа.

Энэ үеэр Ерөнхий сайд хэлэхдээ “2009 онд Петро Чайна Дачин Тамсаг ХХК нь үйл ажиллагаагаа өргөтгөн хайгуул, үнэлгээ, ашиглалтын ажил болон цахилгаан эрчим хүч, замын дэд бүтэц зэрэг ажилд нийт 500 гаруй сая ам.долларын хөрөнгө оруулах төлөвлөгөөтэй ажиллаж байгааг дэмжиж байна. Ялангуяа 2010 оноос Бүтээгдэхүүн хуваах гэрээний дагуу газрын тосны үр ашигтай нээлт зарлаж, үйлдвэрлэлийн олборлолт эхлүүлэх гэж байгаа нь сайшаалтай хэрэг. Газрын тосны олборлолтын хэмжээ жилээс жилд нэмэгдэж байгаа энэ үед газрын тосны бүтээгдэхүүний дотоодын хэрэгцээг хангах зорилгоор цаашид өөрийн оронд газрын тос боловсруулах үйлдвэр байгуулах зорилт тавин ажиллаж байгаа тул манай улсын Газрын тосны агентлагтай хамтран судалгаа хийж ойрын хугацаанд ажил хэрэг болгох нь зүйтэй” гэсэн юм.

Ноён Ван Дунжин хэлэхдээ “Хятадын үндэсний газрын тос, байгалийн хийн корпораци Монгол Улсад 100 хувийн хөрөнгө оруулалттай Петро Чайна Дачин Тамсаг ХХК-ийг байгуулан үйл ажиллагаагаа амжилттай явуулж байна.

Дөрвөн жилийн хугацаанд 550 сая ам.долларын хөрөнгө оруулалт хийж, 2,3 сая баррель газрын тос туршилтын байдлаар олборлон, Монгол улсын төсөвт 40,4 тэрбум төгрөгийг оруулаад байна. Цаашид манай компани одоо хайгуул хийж байгаа талбайдаа хайгуулаа үргэлжлүүлэх, боловсруулах үйлдвэр барих, дамжуулах хоолой зэрэг олон асуудлуудаар судалгаа хийж, хамтарч ажиллах сонирхолтой байна” гэв.

Хариуд нь “манай улсын газрын тосны салбарыг хөгжүүлэхэд үнэтэй хувь нэмэр оруулж буй та бүхэнд талархаж байна. Монгол Улсын Засгийн газар газрын тосны салбарын үйл ажиллагаанд хуулийн хүрээнд бүх талын дэмжлэг туслалцааг үзүүлэх болно” гэж Ерөнхий сайд хэллээ.

Засгийн газрын ХМА-тай хамтран бэлтгэв.